Ang “Mga Kalansay sa Hardin ng Panginoon” ay koleksiyon ng mga piling maikling kuwento ni Ronaldo Soledad Vivo, Jr. mula 2012 hanggang 2023. “May pangkalahatang pakiramdam ng pagiging basag, sabog, at putol-putol ang mga akda sa koleksyon. Sinasadya man o hindi, maaaring mahinuha sa anyo ng pagkukuwento ang pakiramdam ng pag-iwas sa mga nakasanayang kaayusan. Maaaring magkaroon ng pakiramdam, sa pagbabasa ng mga kuwento ni Vivo, ng pakiramdam na ang mga manunulat/tauhan/mismong mga istorya ay may hindi pagsang-ayon sa mga bakas at pagpapahiwatig ng kung ano ang itinatrato bilang “wasto” o “maayos” sa ating daigdig.” - Vladimeir Gonzales UP Diliman, Professor Writer, Translator, Playwright “Para sa iba, na ang default setting ay panatiliin ang world peace sa volatile na ngang komunidad, signos ang pagsulpot ng mga tulad ni Vivo ng gunaw—isang hindi magandang pangitain. Pero kung ako ang tatanungin, ang mga sandaling ito ng tunggalian, girian, polemiko, kumprontasyon, at dikdikan ang kailangan upang makaalagwa ang panitikan ng Pilipinas mula sa matagal nang pagkabalaho nito sa isang napakapiyudal at napakakonserbatibong burak-kumunoy. Kung ako ang tatanungin, ang mga tulad ni Vivo ang magtutulak sa panitikan ng Pilipinas sa mga landas na pinangingimian nitong lakaran.” - Amado Anthony Mendoza III UP Diliman, Professor Novelist, Translator “The stories in this collection come together as a tapestry of violent histories of contemporary Philippine society. What you are about to read from Ronaldo Vivo Jr. is a testament to his narrative prowess as a weaver of words as he delves into issues and scenarios from his understanding of the human condition. The characters in his stories sing the familiar melodies of struggle while attempting to be true to their own tune and truth amidst the political and cultural nuances of Philippine realities” - Christine Lining Bulandus Poet and Visual Artist Melbourne, Australia