XX საუკუნის ამერიკელი მწერალი ვლადიმირ ნაბოკოვი ეროვნებით რუსია, თუმცა ის იძულებული გახდა, ოჯახთან ერთად რუსეთიდან ჯერ ევროპაში, შემდეგ კი ამერიკაში გადახვეწილიყო. შესაბამისად, მწერლის შემოქმედებაც პირობითად ორ ნაწილად იყოფა. პირველი ნაწარმოებები ნაბოკოვმა რუსულად დაწერა, ამერიკაში ემიგრაციის შემდეგ კი უკვე ინგლისურად წერდა. მას, როგორც პროზაიკოსს, საერთაშორისო აღიარება სწორედ ინგლისურენოვანმა რომანებმა მოუტანა. ამ წიგნში შესული ორივე რომანი – "გეპატიჟებით სიკვდილით დასჯაზე" და "მეფე, დამა, ვალეტი" – ნაბოკოვის შემოქმედების ადრეულ პერიოდს განეკუთვნება და, შესაბამისად, რუსულადაა დაწერილი. ორივე რომანი, ნაბოკოვის სხვა წიგნების მსგავსად, მწერლის რთული და საინტერესო ბიოგრაფიის გამოძახილია. კრიტიკოსები არაერთ პარალელს ავლებენ ნაბოკოვის ოჯახის წევრებისა და პერსონაჟების თავგადასავლებს შორის.