Sa tournament ng TALA Online sa bayan ng Balanga, namatay ang lahat ng manlalaro maliban kay Janus. Sunod-sunod pa ang naging kaso ng pagkamatay ng mga kabataan sa computer shops sa iba’t-ibang panig ng bansa. Kinontak si Janus ng nagpakilalang Joey, isa rin umano sa mga nakaligtas sa paglalaro ng TALA na gaya niya. Hindi inasahan ni Janus ang mga matutuklasan niya mula rito na mag-uugnay sa kanya sa misteryo ng kinahuhumalingan niyang RPG—at sa alamat ng Tiyanak mula sa Tábon!

APAT NA BUWAN NA SI JANUS SA MANSIYON NINA MANONG JOEY SA AGONO PERO NAROON PA RIN ANG SAKIT NG DILANG-KARAYOM NG MANANANGGAL SA PUSO NIYA DAHIL SA PAGKAWALA NG MGA MAHAL SA BUHAY AT SAPILITANG PAGLAYO KAY MICA. Simula ng Christmas break nang mawasak ang proteksiyon ng mansiyon laban sa Tiyanak at sa mga kampon nito. Matinding barang ba ito? Nawawala rin si Mira, ang isa sa kambal na baganing kasing-edad ni Janus at inampon din nina Manong Joey. Ipinagtapat naman ni Renzo kay Janus ang matagal na palang sinusundan ni Manong Isyo: bumalik sa mapa ng utak ng dalawang manong ang brain imprint ng Papa ni Janus at maaaring buhay pa pala ito!

Bago naglaho si Janus habang naglalaro ng tala, nakita ni Manong Joey sa utak nito ang hinahanap nilang paraluman. Sinundo ni Renzo si Mica sa Balanga para protektahan ito sa Angono at dahil may kaugnayan ito sa paralumang nakita ni Manong Joey kay Janus. Samantala, nasa Kalibutan pa rin sina Manong Isyo para hanapin si Mira na malamang na nakuha ng mga mambabarang. Walang kaalam-alam ang lahat kung nasaan na si Janus hanggang sa makita ni Manong Joey na humihiwalay ang anino ni Renzo sa katawan nito at maaaring matagal na pala itong ginagamit ng Tiyanak!

Hindi natagpuan nina Janus ang katawan ni Renzo sa Paanan ng Bundok Banog. Bumalik sila sa Angono para hanapin ang puwang ng mga wala na, at para hanapin ang sagot sa mga naroongtanong: Ano na ang nangyayari kina Manong Joey sa Kalibutan? Wala na bang nakakita kay Boss Serj mua noong Pasko? Bakit parang nanghihina ang mangindusa ni Janus? At higit sa lahat, nasaan ba talaga si Tala?

Ang akala ni Janus, pangkaraniwang laro lang ang TALA Online. Sunod-sunod ang pagbabago sa buhay niya matapos ang kahindik-hindik na pangyayari sa RPG tournament sa sinalihan niya. Pero nang matuklasan niya ang tunay na kaugnayan ng larong ito sa alamat ng Tiyanak ng Tabon, wala na siyang magawa kundi ipagpatuloy ang paglalaro!

Matapos ang paulit-ulit na pakikihamok laban kay Sidha at sa Tiyanak, natagpuan na ni Janus sa wakas si Tala. O si Tala na nga ba ito? Dinala siya ng babae sa pinakapusod ng Dalem—ang bayan sa kailaliman ng Kalibutan na itinatag ng mga pusong na kumukupkop kay Tala sa loob ng mahabang panahon—para ipaalam kay Janus ang papel nito bilang ikalimang sinag sa pangwakas na laban para sugpuin ang Tiyanak. Sa huling aklat na ito ng serye, nag-aabang kay Janus ang lihim na maghahatid sa mga pakikipagsapalaran at pasya na kailangan niyang gawin sa ngalan ng kaligtasan ng Santinakpan!