Taong 2028. Walong taon matapos ang zombie outbreak, nahahati na sa zones ang buong mundo: Ang Red Zones kung nasaan ang karamihan ng mga survivors; ang Black Zones na tadtad na ng mga zombies; at ang Blue Zones kung saan ligtas na namumuhay ang mayayaman. Sanay na magpalipat-lipat ng Red Zones si Mars kasama ang kaniyang Lola Vicky at best friend na si Bey para maghanap ng gamit na puwedeng ipagpalit at banyong may tubig. Isang araw, napagpasyahang magpunta ni Mars sa pinakamalapit na Blue Zone at may natuklasang sekretong mas malala pa sa mga nangangaing zombie!

ISANG TAON MATAPOS SUMUGOD SA BLUE ZONE, PUMIPILA PA RIN SA PALITAN NG AYUDA SINA MARS, BEY, AT LOLA VICKY. At mas mahirap na ang búhay ngayon—tinutugis pa rin ng gobyerno ang mga nakasama ng Master Raider sa paglusob! Bukod sa paghahanap ng maipagpapalit na mga gamit at araw-araw na pakikipagsapalaran sa Black Zone, hindi pa rin nawawala ang banta ng dumaraming zombie! Pero hindi na lamang gobyerno at mga buháy na bangkay ang kalaban. Mararating pa kaya nina Mars ang Green Zone?