★ National Book Awardee for Graphic Literature (Filipino) ★ Isang lalake ang bigla na lamang nagising sa loob ng isang puno sa gitna ng kagubatan na walang alaala kung sino siya at saan siya nagmula. Ang tanging alaala lang niya ay isang imahe ng babae na nakikita niya sa kanyang panaginip, at ang tanging nararamdaman niya ay isang matinding gutom na mabilis na namumuo sa kanyang walang pusod na sikmura. Isang gutom na mapapawi lamang ng laman...at dugo.

Maligayang pagbabalik sa ating munting mundong nababalot ng hiwaga. Nananabik na ba kayong makabalik sa piling ng ating mga butihing aswang? Halikayo't humimlay muli sa mga bisig ni Elias, halikan ang kahali-halinang labi ni Sabel, at makinig sa mga tula ni Tasyo. Malugod kayong inaanyayahan ng tatlong ito sa kanilang hapag. Ingat-ingat lamang at baka kayo pala ang ihahain.

LAHAT NG LIHIM AY MABUBUNYAG. WALANG HINDI MAGKAKAMIT NG PARUSA. Ang pagbabalik ng mga multo ng nakaraan, naghahanap ng hustisya: ang malagim na sinapit ng taumbayan ng San Diego, ang pagpapatuloy ng brutal na paghihiganti ni Salome sa lahat ng nagmalupit, ang pagsiklab ng apoy ng rebolusyon ni Matanglawin, ang paglalim at pagdilim ng lumalawak na puwang sa pagitan ng mga aswang, ang rebelasyon ng Tunay na Halimaw ... ito na ang mga Huling Araw ng Paghuhukom.